Indicaturs da finanzas da las vischnancas grischunas

Ultra da quai vegnan deducidas las retratgas d'agen chapital e quintads ensemen ils tschains e l'amortisaziun da las obligaziuns envers la cassa da pensiun. Ina preschentaziun detagliada da la calculaziun da l'atgna finanziaziun po vegnir cuntegnida en la Recumandaziun pratica tar il model armonisà da contabilitad 2 per vischnancas grischunas . Atgna finanziaziun per abitanta u abitant en CHF: atgna finanziaziun dividida tras la populaziun permanenta.

Indebitament net/facultad netta(-) absolut en CHF: l'indebitament net absolut en CHF è il chapital ester minus la facultad finanziala. Ina valur negativa (plus facultad finanziala che chapital ester) correspunda ad ina facultad netta. Indebitament net/facultad netta(-) per abitanta u abitant en CHF: l'indebitament net en CHF per persuna correspunda al chapital ester minus la facultad finanziala, dividì tras la populaziun permanenta.

Quest indicatur da finanzas vegn duvrà sco valur per il grad d'indebitament. Ina valur negativa (plus facultad finanziala che chapital ester) correspunda ad ina facultad netta per persuna. L'indicatur sa lascha divider en las suandantas categorias: facultad netta < 0 CHF indebitament pitschen: 0 - 1'000 CHF indebitament mesaun : 1'001 - 2'500 CHF indebitament grond : 2'501 - 5'000 CHF indebitament fitg grond : > 5'000 CHF Grad d'atgna finanziaziun en pertschient: sch'ins metta en relaziun l'atgna finanziaziun cun las investiziuns nettas, resulta il grad d'atgna finanziaziun en pertschient.

El inditgescha quant enavant che novas investiziuns pon vegnir finanziadas cun agens meds. A vista mesauna duess il grad d'atgna finanziaziun importar en media 100%, resguardond er l'indebitament actual. Quest indicatur po esser suttamess a fermas fluctuaziuns e duess perquai vegnir considerà a vista mesauna.

Tut tenor la situaziun da la conjunctura duai il grad d'atgna finanziaziun importar: ideal : > 100% bun fin sustegnaivel : 80% - 100% problematic : 50% - 80% nunsuffizient : < 50% Quota d'atgna finanziaziun en pertschient: quest indicatur metta l'atgna finanziaziun en relaziun cun las entradas currentas. El infurmescha davart la capacitad finanziala e davart la libertad d'agir finanziala d'ina vischnanca. L'indicatur sa lascha divider en las suandantas categorias: buna : > 20% media : 10% - 20% flaivla : < 10% Part dals custs da finanziaziun en pertschient: la part dals custs da finanziaziun correspunda a la grevezza netta dals tschains plus las amortisaziuns ordinarias da la facultad administrativa en pertschient dals retgavs currents.

Ella è pia in indicatur impurtant per la grevezza che l'administraziun da finanzas da la vischnanca chaschuna tras ils custs da chapital: pli auta che la quota è, pli pitschna che la libertad d'agir finanziala vegn. L'indicatur vegn anc influenzà per part dals gronds custs d'amortisaziun en connex cun la midada a l'OKM2. Bains administrativs ch'èn fin ussa bilantschads tenor OKM1 ston vegnir amortisads entaifer maximalmain 12 onns.

Sche la durada d'amortisaziun vegn reducida voluntarmain, creschan ils custs d'amortisaziun annuals. L'indicatur po vegnir repartì en las suandantas categorias: pitschna : < 5% sustegnaivla : 5% - 15% auta : > 15% Quota da la grevezza da tschains en pertschient: la quota da la grevezza da tschains correspunda a la grevezza netta da tschains en pertschient dals retgavs currents. Ella inditgescha tge quota dals retgavs currents ch'è liada tras la grevezza da tschains.

Pli bassa che questa valur è, pli grond ch'il spazi d'agir finanzial da la vischnanca vegn. L'indicatur po vegnir dividì en las suandantas categorias: buna : 0% - 4% suffizienta : 4% - 9% nauscha : > 9% Quota da l'indebitament brut en pertschient: sch'ins metta en relaziun l'indebitament brut (debits currents sco er da curta e da lunga durada) d'ina vischnanca cun las entradas currentas, survegn ins la quota da l'indebitament brut.

Questa valur permetta da giuditgar la situaziun d'indebitament, q.v.d. i vegn respundida la dumonda sche l'indebitament stat en ina relaziun raschunaivla cun las entradas generadas. L'indicatur sa lascha divider en las suandantas categorias: fitg buna : < 50% buna : 50% - 100% media : 100% - 150% nauscha : 150% - 200% critica : > 200% Quota da las investiziuns en pertschient: quest indicatur reflectescha las investiziuns bruttas en pertschient da las expensas totalas consolidadas.

La quota da las investiziuns mussa l'activitad d'investiziun e sia influenza sin l'indebitament net. L'indicatur sa lascha divider en las suandantas categorias: activitad d'investiziun flaivla: < 10% activitad d'investiziun mesauna: 10% - 20% activitad d'investiziun ferma: 20% - 30% activitad d'investiziun fitg ferma: > 30% Tut tenor la grondezza da la vischnanca variescha la limita d'activaziun per las vischnancas, quai che restrenscha la forza expressiva da singuls indicaturs en la cumparegliaziun intercommunala.

En connex cun la valitaziun dal management da finanzas d'ina singula vischnanca vegnan ils indicaturs da finanzas per regla analisads sur ina perioda da plirs onns.