Bordalen lok.1

Grunnen består av slåttemark på påfylte massar. Lokaliteten er avgrensa av enden på dyrkingsspora i vest og aust. I nord og sør er den avgrensa av negative sjakter.

Sjakt 8 i nord og sjakt 6 og 9 i sør. Dyrkingslaget ligg omkring midt i sjakt 7. Det består av lysebrun, litt feit, siltig sand med kollinse i topp og botn.

I plan kom det fram som flekkar med kol. Laget startar omkring 3,5 m inn i sjakta frå vest. Før dette er det matjord og påfylte massar rett på oransjebrun, siltig sand.

Laget forsvinn inn i steinar omkring 3 m frå austre ende av sjakta. Her forsvinn også det oransje sandlaget og det ser ut å vere påfylte massar rett på elvemassar. Dyrkingslaget er mest tydeleg og tjukkast i nordre profil i sjakta.

I søre profil er det tynnare enn i nordre, men tydeleg i vestre del. Det blir svakare og tynnare mot aust. Dyrkingsflata fortsett sannsynlegvis mot nord og sør.

I plan var det vanskeleg å sjå ein avgrensing på kolflekkane mot vest og aust. Lokaliteten er derfor trekt rundt heile sjakta. I topp er det omkring 7 cm med torv (lag 1).

Under er det omkring 40 cm med matjord og påfylte massar (lag 2). Lag 2 inneheld litt feit sand, mykje stein og litt porselen. Lag 3 er omkring 20 cm med lys oransjebrun, siltig sand.

Laget inneheld nokre linser med strandgrus. Dyrkingsslaget (lag 4) ligg under sanda, og består av lysebrun, litt feit, siltig sand med kollinser i topp og botn. I dokumentert profil varierar dyrkingsslagets tjukkleik frå 6 til 14 cm.

Under dyrkingsslaget ligg eit nytt sandlag (lag 5). Lag 5 består av lyse brunoransje, siltig sand. I dokumentert profil er laget tynt i vest (3 cm tjukt) og blir tjukkare mot aust (12 cm tjukt på midten og 23 cm heilt i aust).

I botn er det elvemassar, store steinar med lysebrun sand, til omkring 130 cm djupne. Sjakta fylte seg med vatn her, så det er ikkje gravd djupare.