Lokalitet 4

Den ligg på ei lita flate som er ein del av ein større flate aust på eigedomen gnr. 240, bnr. 5, søraust i planområdet. Den er definert til om lag 130 kvm i utstrekning. Lokaliteten ligg på ei nordaustvendt flate om lag 17– 18 høgdemeter over havet.

Den er dekt av torvtustar og torvmyr mellom spreidde flekker av bart berg, og lausmassane er relativt tørre. Lokaliteten er definert av tre funnførande prøvestikk: JA18, JA19 og JA21. Den er avgrensa av fire funntomme prøvestikk og elles delvis av lendetilhøva, særleg i nord, aust og sør ved område med bart berg.

Det er funne 6 funn på lokaliteten som er fordelt på dei tre funnførande prøvestikka. Funna er av avslag. Råstoff er av flint.

Gjenstandane som er funne på lokaliteten kan ikkje brukast til å typologisk datere lokaliteten til ein bestemt arkeologisk tidsperiode. Strandforskyvningskurva for området viser at lokaliteten var strandbunden i tidlegmesolitikum (om lag 9500–8200 f.Kr.) og seinare igjen på høgda av tapestransgresjonen i seinmesolitikum (om lag 6300–4000 f.Kr.).